Wala Na

Paano ko isusulat
Ang kawalan
Sa pagkawala
Ng saglit, na minsan
Ay sumambulat
at kumawala
Sa tagipusu-on*
Nitong manunulat
At saglit na nagdala
Sa isang di maisulat
Ng pagpapakawala?
Kaya Ngayon
Wala nang maisulat.
Pagkat saglit lang din
Ang pagkawala
Nung saglit,
Na hahantong
Lang din naman pala
Sa wala
At sa kawalan,
At maiiwan akong
Pilit sinusulat,
Ang kawalan
Laman makaalpas,
Kahit saglit,
At tuluyang mawala
Sa kawalan.

TALYER

Kailangan ko na talagang pumunta sa talyer mamaya
Andami dami na kasi akong napapansing sira
Baka mamaya, titirik na lang sa kalsada bigla
At iiwanan ako dun pa sa pinakagitna

Palagay ko merong leak, patitignan ko
May nararamdaman kasi akong likido
Tulo lang ng tulo, malamang may tagas
Kaya siguro ambilis bilis ko maubusan ng gas

Pati yung wiper ipapaayos ko na rin
Umuulan ulan pa man din
Takaw disgrasya pag wala akong makita
Dahil babagal bagal magpahid ng basa

Sira din yata ang gasolinador ko
Ayaw kasi umusad kahit apakan ng todo
Damay na rin siguro ang preno
Tuloy tuloy lang kasi, at di ko kaagad agad maihinto.

Mas lalong kailangan matignan ang makina
Papalya palya na kasi at hinang hina.
Mukhang bibigay na, ansama sama ng tunog
Sa sobrang gamit, tiyak, kung bakit nabugbog.

Kailangan ko na talagang pumunta sa talyer mamaya
Andami dami na kasi akong napapansing sira
Nagsimula lang to nung iwanan mo ako kanina
Na nakatunganga sa gitna ng daan at nag iisa.

O.N.S

Unan mo’y mga bisig ko
Sa aandap-andap na ilaw
Kinumutan kita ng yakap
Hingal at kapwa sisinghap-singhap

Salikop ng labi mong bumibigay buhay
Angkin mo’t ayaw mapaghiwalay
Mga anghel kaya’y magalit
Sa mapangahas kong pagpuslit
Sa likurang pintuan ng langit?


Buong lakas kong naisambulat
Sinimot, nilasap mo, ulang kumalat
Pagbuhos ng bugso ng nakaw na saglit
Saan kaya kakanlong, sa bagyong masalimuot

Ngunit haring araw, lulok na sa kanyang trono
Bangon na, bago pa man makahalata ang mundo
Halik ang syang tanging huling gawad
Bago lisanin, unan, kumot, bisig, at nakaw na saglit


***
nanalo yung poem na ONS sa meritage press holiday poetry contest