bolpen@kape: 1/8

Lihim na Daan

Isinisilang na muli ang mga makabagong manunula sa panahon ng kung saan ang lahat ay abala sa pag-aayos ng gamit para sa gagawing paglikas. Kapag ang lahat ay nalilito at tumatakbo. Huwag ninyo silang pababayaan. Balutin sila ng kapangyarihang nananangan sa ating mga letra at hayaang mahimlay sa paraiso na matagal na nating inihahandog sa kanila. Minsan pa gagawa tayo ng lagusan mula sa mundo ng mga tao patungo sa ating mundo. Painumin ang mga nauuhaw at pakainin ang mga nagugutom. Sila ay mga pagod sa pakikidigma sa kanilang mundo. Kumutan ninyo ang mga giniginaw, gamutin ang mga sugatan. Sila ang magiging buhay na patotoo na may mundo pa sa labas ng kahon. May mundo pa sa labas ng kahon..... mayroon pa......
-ZKEY

salubungin ang panibagong oras
ng pakikibaka sa bawat elemnto ng kasalukuyan..
huwag manatiling piping saksi,
huwag piringan ang mga mata..
tayo ay mamulat
at hayaang ang tinta
ay muling dumaloy sa ating panulat..
gawin natin itong sandata..
'pagkat sa ganito..
tayo ay magiging malaya..
-pen palaboy

panahon na upang bumangon at mangatwiran...

sa mundo kung saan
matimbang ang langis
mananatiling asin
ang luha mo't pawis
meron bang puwang
ang iyong tinig?
kung lagi nang panis
ang laway mo sayong bibig?
sa mundo kung saan
hari ang semento
mananatiling tatsulok
ang hugis ng mundo
magagawa mo bang
ibuwal ang pader?
kung ang tanging sandata mo
ay lapis at papel?
sa mundo kung saan
bida ang pilosopo
mananatiling blangko
ang laman ng 'yong ulo
meron bang silbi
ang iyong dahilan?
kung ang tanging alam mo
ay iling at tango?
-Vener

hanggat lumuluha ng ideya ang mga panulat
kasabay nating tutuklas
ang mga syentista
ng bawat hiwaga at misteryo
ng buhay
at ng kanyang pakikibaka at tagumpay
mga pagluha at galak
at sa mga naabot ng paningin

ang tanging kaibahan natin
sa kanilang layunin
ay ang hindi limitadong pang unawa
at pagbibigay ng kahulugan gamit
ang tumutulong kaisipan
na pumapatak sa sulatan.....
-ironman